Саха Өрөспүүбүлүкэтин Ил Дарханын уонна Бырабыыталыстыбатын дьаһалтатын салайааччыта Георгий Михайлов бу күннэргэ Сунтаар улууһугар үлэлии сылдьар. Кини Сунтаар улууһа төрүттэммитэ 225 сылын бэлиэтиир тэрээһиннэри тэрийэр хамыыһыйа салайааччытынан ананан, бу улахан үбүлүөйдээх сылы хайдах атаарарга былааннары оҥорор.
Бэҕэһээ улуус баһылыга Анатолий Григорьевы кытта сүбэ мунньах ыытылынна. Мунньахха Улуу Тунах Ыһыаҕын тэрийии боппуруостарыгар улахан болҕомто уурулунна. Бу улуус олоҕор бэлиэ түгэнинэн буолар, манан сиэттэрэн, спорт манеһын стадионун саҥардыыга үлэ барар. Бу сүҥкэн үлэ «Үтүө дьыала» тосхолунан ыытыллара былааннанар.
Үбүлүөйдээх сылы үрдүк таһымҥа бэлиэтииргэ улуустан төрүттээх урбаанньыттар эмиэ күүс-көмө буолуохтара. Кинилэр төрөөбүт дойдуларыгар тапталларын, ытыктабылларын көрдөрөн, бу тэрээһиннэргэ үбүнэн да, тэрийиинэн да көмөлөһүөхтэрэ.
Сунтаар улууһун 225 сыллаах үбүлүөйэ – бу историяны ахтыы, төрүт үгэстэри чиэстээһин, кэлэр кэми торумнааһын буолар.
