Сунтаар улууһун баһылыга Анатолий Григорьев салайааччылаах делегация байыаннай дьайыы сириттэн Москваҕа кэллэ. Дойду тэбэр сүрэҕэр номнуо иккис күнүн улахан тэрээһини тэрийэр. Күн бэҕэһээ Кыайыы түмэлигэр оҕо дьоҕурун сайыннарар киин уонна улуус дьаһалтатын биир ситимнээх үлэлэрин түмүгүнэн, 400-тэн тахса биир дойдулаахтарбыт, Аҕа дойду Улуу сэриитигэр кыттыбыт дьоруойдарбыт ааттара көмүс буукубанан суруллан, сырдык сэбэрэлэрэ виртуальнай түмэл быһыытынан дьон көрүүтүгэр турда. Бу туһунан «Саха» НКИХ ханаалыгар нууччалыы, сахалыы тылынан олус үчүгэй биэриилэр таҕыстылар.
Оттон бүгүн Федерация Сэбиэтин чилиэнэ Сахамин Афанасьевы көрүстүлэр. Манна Анатолий Григорьев Аллыҥа, Уһун Күөл нэһилиэктэрин баһылыктара Кирилл Марков, Иван Игнатьев уонна ыччат отделын салайааччыта Трофим Иванов кыттыыны ыллылар.
Кэпсэтии сүрүннээн байыаннай дьайыы тула буолла. Сунтаар улууһа бүттүүн түмсэн, биир дойдулаахтарыгар көхтөөх көмөнү оҥорорун, байыастары өйүүрүн, делегация миэстэтигэр тиийэн үлэлиирэ наадалааҕын Сэбиэт тутаах үлэһитэ бэлиэтээн эттэ.
Анатолий Григорьев миэстэтигэр үлэлээбит, байыастары кытта илии тутуһан алтыспыт киһи быһыытынан ордук туохха наадыйалларын, ханнык кыһалҕалар баалларын кэпсээтэ. Сүбэ мунньахха инникитин хайдах, туох-ханнык үлэ барыахтааҕын торумнаатылар.
