Бырабыыталыстыба сыллааҕы үлэтин отчуота Сунтаар улууһун киинигэр Сунтаарга буолла. СӨ бырабыыталыстыбатын бэрэссэдээтэлин солбуйааччыта Георгий Степанов салайааччылаах үс бөлөх барыта холбоон 26 нэһилиэк олохтооҕор үлэ түмүгүн отчуоттаата.
Сунтаардар илэ көрсөн кэпсэтэн, тустаах ыйытыктарга тута эппиэти ылар учугэйин бэлиэтээтилэр.
Сунтаарга РФ бэрэсидьиэнэ Владимир Путин көҕүлээбит «Үөрэҕирии» национальнай бырайыагынан 450 миэстэлээх лицей тутуллар. Олохтоохтор оройуон киинигэр оскуола-уһуйаан тутуутун боппуруоһун туруорустулар. «Туллукчаан» уһуйаан үлэтэ өрөспүүбүлүкэ үрдүнэн бастыҥынан сыаналаммыта. Ол эрээри уһуйаан эбийиэгэ 1965 сыллаах, эргэ.
Ону тэҥэ улуус олохтоохторо иккис оройуоннааҕы балыыһа киинин тутуутун боппуруоһун көтөхтө. Билиҥҥи кэмҥэ эбийиэк бырайыактыыр-сметалыыр докумуона оҥоһуллар. РФ Доруобуйа харыстабылыгар федеральнай бырагаарамаҕа киллэрэргэ сайаапка биэрбиттэр.
Санатар буоллахха, өрөспүүбүлүкэҕэ доруобуйа харыстабылын маҥнайгы сүһүөҕүн РФ бэрэсидьиэнэ Владимир Путин көҕүлээбит «Доруобуйа харыстабыла» национальнай бырайыагынан саҥардыллар.
Саха сиригэр бүтэһик биэс сыл иһигэр федеральнай уонна регионнааҕы бырагыраамаларынан 80-тан тахса быраас амбулаторията уонна фельдшер-акушер пууна үлэҕэ киирдэ.
