Сунтаар улууһун уһук турар Бүлүүчээн нэһилиэгин «Матери России» салаата «Кэрэни кэрэхсиир сырдык эйгэлээх ийэлэр» диэн тэрээһин ыыттылар. Сунтаар нэһилиэгиттэн «Матери России» сүрүн салайар састааба 9 буолан уонна ыалдьыт быһыытынан икки талба талааннаах Александра Яковлева, Анна Трифонова диэн улуус култууратын эйгэтиттэн ырыаһыт, хомусчут, тойуксут кыргыттар ыалдьыттаатылар.
Араас маастар-кылаастар ыытылыннылар. Сунтаар улууһун аҕа баһылыга Анатолий Григорьев бары ийэлэргэ эҕэрдэ тылын этэн баран Бүлүүчээн нэһилиэгин Ытык Далбара, Мария Павловна Глухарева 90 сааһын туолбутунан эҕэрдэ сурук уонна бэлэх туттарда.
Олохтоохтор уонна ыалдьыттар күүстэринэн олус үчүгэй ырыалар ылланнылар, үҥкүүлэр үҥкүүлэннилэр, Далбар Хотуттар иистэрин, оҥоһуктарын көрдөрдүлэр. Ол кэнниттэн маастар-кылаастарынан, ким тугу интэриэһиргииринэн үөрэнии, кыттыы буолла.
