«Тойота Гайа» массыына суоппара Хаҥалас улууһун «Умнас» айан суолугар сатыы киһини түҥнэри көттө. Бу туһунан Россия ис дьыала министиэристибэтин Суолга куттал суох буолуутун судаарыстыбаннай иниспиэксийэтин Саха сиринээҕи салаатын пресс-сулууспата иһитиннэрэр.
Суолга быһылаан ахсынньы 1 күнүгэр 16:10 чааска айан суолун 92-с килэмиэтиригэр буолла.
«48 саастаах «Тойота Гайа» суоппара Покровскайтан Мохсоҕоллоох диэки хайысханан айаннаан иһэн, 31 саастаах эр киһини түҥнэри көттө. Быһылаан түмүгэр, эмсэҕэлээччи миэстэтигэр тыына быһынна. Иккис сатыы хааман испит киһи — 40 саастаах эр киһи — эчэйиини ылбата», — диэн иһитиннэриигэ этиллэр.
Бэрэбиэркэ түмүгүнэн, суоппар 23 сыл ыстаастааҕа, А, А1, В, В1, М категориялаах удастабырыанньалааҕа билиннэ. ГИБДД өттүттэн быйыл айан оскуораһын үрдэтэн уонна хааччахтыыр сурааһыныгар тохтообокко ПДД ирдэбилин кэспит.
Саахал тахсар кэмигэр суоппар аһыы утаҕы испэтэҕэ, куттал суох буолуутун хааччыйар эрэмиэнин баанан испитэ, эчэйбэтэҕэ бэлиэтэнэр.
«Сатыы туораан испит киһи таҥаһыгар уоту тэйитэр, сырдаан көстөр элэмиэнэ суох. Иккис сатыы туораан испит киһи итирик туруктааҕа биллэр — 0,61 мг/л», — диэн пресс-сулууспа чопчулуур.
Суоппар этэринэн, хараҥаҕа Мохсоҕоллоох диэки хайысханан, суол кытыытынан эр киһи хааман иһэрин көрбүт, онтон массыына иннин хаҥас өттүгэр охсуллуу тахсыбыт. Туох буолбутун өйдөөбөккө массыынаттан тахсан көрбүтэ сатыы дьонтон биирин түҥнэри көппүтүн өйдөөбүт.
Саахал тахсыбытынан бэрэбиэркэ ыытыллар.
