СӨ Бырабыыталыстыбатын Бэрэссэдээтэлин бастакы солбуйааччы эбээһинэһин толорооччу Николай Бочков сайыҥҥы халаан уутугар анаммыт суһал ыстаап мунньаҕын ыытта, манна Үөһээ Дьааҥы улууһун Суордаах сэлиэнньэтигэр буола турар быһыыны-майгыны көрдүлэр.
Мунньахха бэлиэтэммитинэн, сэлиэнньэҕэ быыһааччылар эбии күүстэрин ыытар былааннаахтар. Наадалаах таһаҕастаах салгын суудуната номнуо көтөн таҕыста. Салгыы Суордаах нэһилиэгэр үлэлииригэр анаан быыһааччылар бөлөхтөрүн көһөрүү буолуоҕа. Билиҥҥи кэмҥэ бөртөлүөт куттала суох түһэр сирэ быһаарылла сылдьар, итиэннэ наада буоллаҕына дьону эвакуациялыырга олохтоохтору хайдах хааччыйар туһунан боппуруостар быһаарыллаллар.
Үөһээ Дьааҥы улууһун дьаһалтатын иһитиннэриитинэн, 11:00 чаастааҕы туругунан, Суордаах сэлиэнньэтин аттыгар уу таһыма 855 сантиметргэ тэҥнэспит (критическэй бэлиэтэ — 780 см). Уу 60 тэлгэһэни, ол иһигэр 54 олорор дьиэни ылбыт.
Олохтоохтору быстах кэмҥэ олордор үс пуун быһаарыллан турар. Билиҥҥи кэмҥэ бары эмсэҕэлээбиттэр аймахтарыгар олороллор.
Сэрэтэр дьаһаллар чэрчилэринэн ууга барар кутталлаах сиртэн 44 ынаҕы-сүөһүнү уонна 136 сылгыны куоттардылар. Оскуолаҕа, уһуйааҥҥа, дьаһалта дьиэтигэр уонна биэлсэр-акушер пуунугар материальнай сыаннастары харайыыга үлэлэр ыытылыннылар — мал-сал үөһээ этээстэргэ таһаарылынна уонна куттала суох сирдэргэ уурулунна.
Маны таһынан, мунньахха уу түһүүтүн кэнниттэн олорор дьиэлэри куурдар инниттэн ититии сезонун болдьоҕун иннинэ саҕалыырга бэлэмнэнии, ону тэҥэ мобильнай сибээһи туруктаахтык хааччыйыы боппуруостарын көрдүлэр.
Хаартыска: sakha.gov.ru
