Ааспыт сууккаҕа өрөспүүбүлүкэҕэ 13 ойуур баһаарын умуруордулар, эбии сэттэни тохтоттулар, бу туһунан СӨ экология миниистирэ Сахамин Афанасьев иһитиннэрдэ.
Ойуур баһаардарын умуруорууга 4 816 киһи уонна 706 тиэхиньикэ үлэлиир.
«Бэҕэһээ, атырдьах ыйын 11 күнүгэр, өрөспүүбүүкэҕэ 200 киһилээх Россия ыксаллаах быһыыга-майгыга сулууспатын аэромобильнай бөлөҕө кэллэ, олортон 126 киһи Миирнэйгэ, 26 киһи Миирнэй оройуонун Полярнай бөһүөлэгэр бааллар», — диэтэ Сахамин Афанасьев.
Россия оборонатын министиэристибэтин 128 киһилээх, 17 тиэхиньикэлээх инженернэй ротата Горнай уонна Нам улуустарыгар үлэлииллэр.
Ми-8 уу кутар бөртөлүөт Нам уонна Хаҥалас баһаардарыгар кытынна. Бе-200 сөмөлүөтү Ньурба оройуонун Арыылаах уонна Сайылык сэлиэнньэлэрин таһыгар күөдьүйбүт баһаардарга туһаннылар.
Өссө биир бөртөлүөт Чурапчы улууһун Туора Күөл нэһилиэнньэлээх пуунун таһыгар баар баһаарга үлэлээтэ. Ил-76 салгын суудуната Үөһээ Бүлүүтээҕи 26-с №-дээх баһаары умуруорууга кытынна.
