Ил Дархан Айсен Николаев 2024 сыл олунньу 29 күнүгэр саҥа ыйаахха илии баттаабыта. Бу национальнай үлэ ырыынагын уонна миграннары хонтуруоллуур ыйаах чэрчитинэн, өрөспүүбүлкэ олохтоохторун үлэлиир интэриэстэрэ көмүскэнэр.
Докумуонунан 2024 сылга патенынан үлэлиир миграннар 32 хайысханан үлэлииллэрэ бобуллар. Ол курдук, ас бородууксуйатын оҥорууга, бытархай атыыга, таксига уонна таһаҕас таһыыга, ону тэҥэ доруобуйа харыстабылын уонна үөрэхтээһин эйгэлэригэр.
«Дойду уонна өрөспүүбүлүкэ бырабыыталыстыбатын быһаарыныытынан, үлэҕэ Россия олохтоохторун ыларга тоҕоостоох. Ол иһин федеральнай сокуоннар көмөлөрүнэн, үлэ сорох хайысхаларыгар хааччахтааһыны киллэрэллэр. Оччотугар олохтоох нэһилиэнньэ бу хайысхаларга үлэлии киирэр. Бу сокуоннары чинчийэргэ, үөрэтэргэ, ылынарга сыллата экспертэр сэбиэттэрэ үлэлиир. Кинилэр биэдэмэстибэлэртэн, урбаанньыттар түмсүү уопсастыбаларыттан, профсойуустартан киирэр этиилэри чуолкайдаһаллар», — диэн СӨ Дьарыктаах буолуу сулууспатын судаарыстыбаннай кэмитиэтин бэрэссэдээтэлэ Светлана Горюшинская эттэ.
Кини бэлиэтииринэн, Ыйаахха ыйыллыбыт хайысхалар патенынан эрэ үлэлиир миграннара сыһыаннаахтар. Ол курдук, Киргизия, Казахстан, Армения уонна Беларусия бэрэстэбиитэллэригэр анал усулуобуйалар үлэлииллэр. Кинилэр РФ олохтоох дьонун-сэргэтин кытта тэҥҥэ үлэлиир бырааптаахтар.
«Дойду бэрэсидьиэнэ Владимир Путин исписэлиистэр тиийбэттэрин суох оҥорорго улахан сыал-сорук туруорда. Билигин «Кадры» диэн саҥа национальнай бырайыак олоххо киирэригэр улахан үлэ ыытыллар. Өрөспүүбүлүкэ таһымыгар «Работающая Якутия. Кадры» диэн бырайыак оҥоһулла сылдьар. Манна үчүгэй түмүктээх, эппиэктээх тэрээһиннэр киирсиэхтэрэ, үлэтэ суох дьону профүөрэхтээһин уонна эбии үөрэхтээһин, хампаанньаларга эдэр исписэлиистэри стажировкаҕа киллэрээһин көрүллүөҕэ», — диэтэ Светлана Горюшинская.
Ону тэҥэ өрөспүүбүлүкэҕэ «Олохтоох каадырдары бырамыысалыннаска» бырайыак көхтөөхтүк үлэлиир. Бүгүн бырайыакка 47 хампаанньа кыттар уонна 60 тыһ тахса Саха сирин олохтооҕо үлэ миэстэтин булла.
