СӨ Суһал штаба анал байыаннай дьайыыга кыттар байыастарын эбии хааччыйыы былааннаах үлэтин салгыыр. Анал байыаннай дьайыы балаһатыгар тирэх пууннар байыастарга гуманитарнай көмөнү быыстала суох тиэрдэллэр.
Бу туһунан брифиҥҥэ СӨ Гражданскай көмүскэлгэ миниистири солбуйааччы Никита Павлов иһитиннэрдэ.
Кини этэринэн, бу нэдиэлэҕэ Дьокуускайтан таһаҕас массыыната айанныаҕа. Кини анал байыаннай дьайыы байыастарыгар 4 тиэхиньикэни, ону тэҥэ 3 кэриҥэ туонна гуманитарнай таһаҕаһы уонна аадырыстаах баһыылкалары илдьиэҕэ. Айан хайысхата Нүөрүҥгүрү нөҥүө ааһыаҕа, манна колонна баһыылкаларынан ситэриллиэҕэ.
Ону таһынан, «Патриотическай» ТОР федеральнай бырагырааматын чэрчитинэн Саха Өрөспүүбүлүкэтин сакааһынан РФ Сэбилэниилээх күүстэригэр биэрэргэ «Сокол» квадроцикллар киирдилэр. Ону таһынан, оҥорон таһаарааччылар «Хотой» FPV-дроннары ыытарга бэлэмнииллэр. Тэҥҥэ өрөспүүбүлүкэ тэрилтэлэриттэн, биэдэмистибэлэриттэн уонна олохтоохторуттан автотранспоры, баһыылкалары хомуйуу уонна байыастарга тиэрдии ыытыллар.
«Байыастарбытыгар бу суолталаах өҥөлөрүн уонна өйөбүллэрин иһин барыларыгар туспа махталбытын биллэрэбит», — диэн Павлов эттэ.
Кини 2026 сыл саҕаланыаҕыттан Саха сириттэн фроҥҥа гуманитарнай таһаҕас 45 рейсэ толоруллубутун, 134 тырааныспар тиэрдиллибитин, ону тэҥэ 203-тэн тахса туонна гуманитарнай көмө уонна аадырыстаах баһыылкалар ыытыллыбыттарын чопчулаата.
Хаартыска: sakha.gov.ru
