2026 сыл саҕаланыаҕыттан Саха сириттэн анал байыаннай дьайыы балаһатыгар байыастарга гуманитарнай көмөнү тиэрдэр икки рейс барда. Байыаннайдарга биэс транспортнай көлө бэрилиннэ.
Бу туһунан нэдиэлэтээҕи брифиҥҥэ СӨ гражданскай көмүскэлгэ миниистири солбуйааччы Яна Наумова иһитиннэрдэ.
«Анал байыаннай дьайыы кыттыылаахтарыгар эбии тэриллэр саҥа бигэргэммит тиһиктэригэр үрдүк технологиялаах оборудованиелар киирдилэр: радиоэлектроннай утарсыы (РЭБ) систиэмэлэрэ, БПЛА (дроннар), араадьыйа ыстаансыйалара, ретранслятордар уонна дроннары утары охсуһар комплекстар. Анал тиэхиньикэ көрүҥнэрин уонна кинилэр тактическэй-техническэй көрдөрүүлэрин талыы билигин байыаннай исписэлиистэри кытта бииргэ ырытыллар», – диэн миниистир солбуйааччыта бэлиэтээтэ.
Кини эппитинэн, «Патриотическай» ТОР федеральнай бырагыраама чэрчитинэн Саха сиригэр «Якт-Сокол» квадроцикллары, «Тимир Ат» электроматассыыкыллары, «Хотой» БПЛА-лары уонна «Як-14» роботизированнай платформалары оҥоруу уонна РФ сэбилэниилээх күүстэригэр тиэрдии салҕанар.
«Табаары оҥорон таһаарыыны олохтоох тэрилтэлэр бигэргэммит графикка сөп түбэһиннэрэн толороллор уонна үлэ өрүүтүн хонтуруолга сылдьар», – диэн Яна Наумова тоһоҕолоон эттэ.
Ону таһынан, өрөспүүбүлүкэҕэ гуманитарнай көмөнү хомуйуу быстала суох ыытыллар.
«Бу байыастарга тиэрдэргэ анаан тэрилтэлэртэн, тэриллиилэртэн уонна өрөспүүбүлүкэ олохтоохторун тус бэйэлэриттэн баһыылкалар, көлөлөр, тиэхиньикэ уонна аадырыстаах кэһиилэр буолаллар. Анал байыаннай дьайыы кыттыылаахтарын эбии тэриллэринэн хааччыйыы үлэтэ салҕанар», – диэн Яна Наумова брифиҥҥэ түмүктээн эттэ.
Хаартыска: www.sakha.gov.ru
