Чурапчы киин балыыһатын коллектива, Сылаҥ орто оскуолатыгар оҥоһуллубут ыарыыттан харыстыыр сирэй экраннарын тутта. Бу туһунан оройуон дьаһалтатын пресс- сулууспата иһитиннэрэр.
Оскуола уонна оройуоннааҕы киин балыыһа профориентацияҕа, доруобуйа харыстабылыгар, улуус доруобуйа харыстабылын историятын үөрэтиигэ бииргэ үлэлээһии туһунан сөбүлэҥҥэ илии баттастылар.
«Доруобуйа харыстабылын салаатыгар элбэҕи олоххо киллэриэхпит, саҥа балыыһалар тутуллуохтара, аныгы оборудованиенан хааччыллыахтара, бу барыта, хас биирдии киһи доруобуйатыгар сүҥкэн кылаат буолуо», — диэн санаатын иһитиннэрдэ оскуола дириэктэрэ Николай Дьяконов.
Чурапчы оройуонугар 2021 сылы оройуон баһылыга Андрей Ноговицын Доруобуйа сылынан биллэрбитэ.
Санатан эттэххэ, оскуола олохтоох көҕүлээһиннэри өйүүр бырагырааманан цифровой Смарт-оборудованиены ылбыта. Ол курдук, Сылаҥ орто оскуолатыгар аграрнай, медицина уонна да атын хайысхаларга оҕолору IT- технологияны туһанан, сайыннарар уонна үөрэтэр эйгэни тэрийдилэр.
