Өрөспүүбүлүкэ былаастара оройуоннар сылгылара уонна сүөһүлэрэ кыһыҥҥы кыстыгы этэҥҥэ туоруулларыгар үлэлэһиэхтэрэ.
«Өрөспүүбүлүкэҕэ хаһаайыстыбаны өйүүр миэрэлэр ылыллаллар. Сүөһү уонна сылгы бигэ туруктаах кыстыга хааччыллыаҕа», — диэн СӨ тыа хаһаайыстыбатын миниистирэ Александр Атласов иһитиннэрдэ.
Билиҥҥи туругунан, Кэбээйигэ 309 туонна комбикорму тиэртилэр, ону тэҥэ Горнайга – 90 туонна, Өлүөхүмэҕэ – 140 туонна. Бүлүүгэ 172 туоннаны илдьэн иһэллэр.
Хаалбыт концентрированнай корм кэриҥэ — 1 712 туоннатан тахса комбикорм, 1 235 туонна зернофураж, 1 335 туонна гранулированнай от уонна алта туонна белковай-витаминнай-минеральнай комплекстары кыһыҥҥы суол арылыннаҕына тиэрдиллиэхтэрэ.
Өрөспүүбүлүкэҕэ сүөһү ахсаана 231 тыһ.төбө буолла, ол иһигэр ыанар сүөһү ахсаана 79 тыһ. кэриҥэ. Оттон сылгы ахсаана 240 тыһ.кэриҥэ, ол иһигэр 120 тыһ. биэ баар.
