Өрөспүүбүлүкэ үрдүнэн төрөөбүт тыл уонна сурук-бичик күнүн чэрчитинэн олунньу 27 күнүгэр диэри тэрээһиннэр ыытыллыахтара. 30-тан тахса тэрээһини бэлэмнээбиттэр.
Ол курдук, Дьокуускайга «Сосновай бор» оҕо сынньалаҥ уонна чэбдигирдэр киинигэр «Төрүт тыл түһүлгэтэ» диэн профильнай смена үлэтин ааспыт нэдиэлэттэн саҕалаабыта. Бу смена Саха сирин 13 оройуонуттан 118 оҕону түмпүт. Оҕо айар кутун-сүрүн сайыннарар смена үһүс сылын ыытыллар.
Олунньу 10-21 күннэригэр өрөспүүбүлүкэ үөрэтэр тэрилтэлэригэр төрөөбүт тыл уонна сурук-бичик декадата буолуоҕа, ол иитинэн ааҕыы, уруһуй куонкурустара, кылаас чаастара (ол эбэтэр кураторскай), викториналар, библиотека чаастара уонна литературнай көрсүһүүлэр тэриллиэхтэрэ.
Олунньу 13 күнүгэр, төрөөбүт тыл уонна сурук-бичик күнүгэр үөрүүлээх тэрээһиннэр ыытыллыахтара. Маны сэргэ ити күн Дьокуускайга Былатыан Ойуунускай аатынан литературнай түмэлгэ СӨ норуодунай суруйааччыта Семен Попов-Сэмэн Туматы кытары көрсүһүү буолар.
Субуотаҕа, олунньу 15 күнүгэр, СӨ Национальнай библиотекатыгар «Сахалыы диктант» диэн өрөспүүбүлүкэтээҕи аахсыйа тэриллиэҕэ. 11-с төгүлүн ыытыллар тэрээһиҥҥэ ким баҕалаах кэлэн саха тылыгар билиитин тургутуон сөп. Хас биирдии кыттааччыга сертификат бэриллэрэ уонна үчүгэй көрдөрүүлээхтэр дипломунан уонна бириистэринэн наҕараадаланыахтара. Ааспыт сылга диктаны түөрт тыһыынчаттан тахса киһи суруйбут.
Баскыһыанньаҕа, олунньу 16 күнүгэр, Өксөкүлээх Өлөксөй аатынан Норуоттар доҕордоһууларын дьиэтигэр В.М. Новиков-Күннүк Уурастыырап «Тойон Дьаҕарыма» сэһэнинэн оҕо испиктээкилин көрдөрүөхтэрэ. Уонна эмиэ ити күҥҥэ Саха тыйаатырыгар Андрей Титаров «Хардааччы Бэргэн» олоҥхотунан Андрей Борисов испиктээкилин сүрэхтиэхтэрэ.
Хаартыска: ЯСИА.
