Россия Төрүт сокуонугар киирэр уларытыылары талыы куоластааһыныгар түөрт хонук иһигэр кэһиилэр бэлиэтэммэтилэр. Бу туһунан өрөспүүбүлүкэтээҕи уопсастыбаннай балаата пресс-сулууспата иһитиннэрэр.
Уопсастыбаннай балаата суһал бөлөҕүн чилиэттэрэ быыбардыыр учаастактары кэрийэллэр уонна миэстэлэргэ куоластааһын хаамыытын хонтуруоллууллар. Суһал бөлөх ону тэҥэ кэһиилэр тахсыыларын туһунан иһитиннэриилэри суһал линиянан тутар уонна кэтээн көрөөччүлэр үлэлэрин бэрэбиэркэлиир.
«Куоластааһын ыытылыытын түөрт хонук иһигэр кэтээн көрөөччүлэр үлэлэригэр уонна куоластааһын процедуратын тэрийиигэ сыһыаннаах ыҥырыылар киирдилэр — Дьокуускай үгүс олохтоохторо ханна, хайдах куоластыахтарын сөбүн билбэттэр. Куоластааччылар бырааптарын кэһии бэлиэтэммэтэ», – диэн этиллэр.
Уопсастыбаннай балаата суһал бөлөҕө куоластааһын түмүктэниэр диэри үлэлиэҕэ.
