Таатта улууһугар сахалартан соҕотох Албан Аат уордьан толору кавалера Дмитрий Ананьевич Петров аатынан ыытыллар 21-с өрөсүүбүлүкэтээҕи научнай-практическай конференция буолла. «Петровскай ааҕыыларга» оскуола бастыҥнара Кыайыы 80 сылыгар туһуламмыт үлэлэрин көмүскээтилэр, уруһуйга дьоҕурдаахтар Кыайыы күнүн оҕо хараҕынан дьүһүйдүлэр, Дмитрий Петров мэтириэтин уруһуйдаатылар, байыаннай тиэхиньикэ макеттарын оҥордулар, итиэннэ «Музей в чемодане» секцияҕа сэрии кэмин уонна тыыл олоҕун кэрэһэлиир маллар кэпсээннэрин тэниттилэр.
Бу тэрээһин биир кэтэһиилээх түһүмэҕэр — «Сулустаах эстафетаҕа» хамаандалар буулдьанан ытыыга бастыҥы быһаарыстылар. Манна Алампа аатынан хамаанда кыайыылаах аатын ылла уонна бу хамаанда бэргэн ытааччыта Никита Мосоркин абсолютнай чемпион үрдүк аатын сүгэн, Петровтар аймах анаабыт бириистэрин — салгын саатын бэлэх тутта.
