Таатта улууһун Г.В.Егоров аатынан Хара Алдан орто оскуолатыгар «Дьиэ кэргэн — олох төрдө» диэн ааттаах конференция ыытылынна.
Конференция сүрүн сыала: оҕону дьиэ кэргэҥҥэ иитии ньымалара уонна албастара.
Оҕолор ийэлэрин, эбэлэрин кытта оҥорбут бырайыактарын көмүскээтилэр.
Ол курдук, Арылхан Жирков ийэтинээн «Иккиэн бииргэ айабыт-тутабыт», Чаҕыл Винокуров ийэтинээн «Дьиэ кэргэммитигэр уон оҕобут бары сахалыы ааттаахтар», Эрсан, Айаан Варламовтар эбэлэрин кытта «Оҕону иитиигэ эбэ, эһэ оруола», Альбина Григорьевна сиэннэринээн «Оҕону кыра эрдэхтэриттэн ааҕыыга уһуйуу», Турантаевтар дьиэ кэргэн «Бэйэ холобуругар сиэннэрбитин иитэбит», Яша эбэтин кытта Татьяна Петровналыын «Дьиэ кэргэнинэн кэтэх хаһаайыстыбаны тэрийэбит», Сардана, Виктория ийэлэрин кытта «Оҕону үлэнэн иитии, кэтэх сылгыны тэнитии», Софи ийэтинээн Оксана Петровналыын «Кыыс оҕону ийэ холобуругар иитии» диэн темаларынан кытыннылар.
Тустаах конференция дьиэ кэргэн бигэ туруктаах, чөл куттаах буоларын туһугар кэнчээри ыччаты иитэр, сайыннарар.
