Таатта улууһугар Былатыан Ойуунускай 1907 – 1911 сылларга үөрэммит оскуолатын сөргүтэллэр. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.
Былатыан Ойуунускай 1907 — 1911 сылларга үөрэммит оскуолата Чөркөөхтөн чугас Муҥха Дэлбэрийбит диэн сиргэ турар. Ойуунускай икки кылаастаах оскуоланы чаҕылхайдык бүтэрбит. Билигин ити оскуола өрөспүүбүлүкэ устуоруйатыгар ураты суолталаах.
Таатта улууһугар маннык эбийиэк хас алаас аайы баар. 2019 сылтан улууска баар пааматынньыктары өрөспүүбүлүкэ салайааччылара, тэрилтэлэр, меценаттар сөргүтэллэр.
От ыйын 15 күнүттэн оскуола дьиэтин Юрий Дедюкин салайааччылаах биригээдэ чөлүгэр түһэрэн саҕалаата. Эрдэ бу биригээдэ Э. Пекарскай ураһатын, В. Трощанскай балаҕан-ураһатын итиэннэ 1867 сыллааҕы тутуу мас ураһаны сөргүппүтэ.
