С.Р. Кулачиков-Эллэй аатынан Чычымах орто оскуолатын базатыгар «Снежный барс-2025» байыаннай спортивнай оонньуу муниципальнай түһүмэҕэ буолан ааста.
Быйылгы Россияҕа Аҕа дойдуну көмүскээччи, Саха сиригэр Ийэ дойдуну көмүскээччи, Таатта улууһугар Кыайыы сылыгар уонна СӨ үөрэҕэриитин туйгуна, Чычымах орто оскуолатын физкультура уонна ОБЖ учуутала Артур Иванов кэриэһигэр ыытылынна.
Спартакиада сыала-соруга — оҕолору дойдуга бэриниилээх буолууга иитии, байыаннай сулууспаҕа бэлэмнээһин.
Быйыл оонньууга тоҕус улуус хамаандата кытынна.
Оонньуу бырагырааматыгар «сулууспаҕа бэлэм, кыргыһыыга күүстээх», «АК-74 аптамааты хомуйуу, ситэтэ суох ыһыы», «маҕаһыыны ботуруоннарынан толоруу», «уопсай физическэй бэлэмнэнии», «байыаннай эстафета» уонна «буулдьанан ытыы» күрэхтэһиилэр киирдилэр. Хамаанда чилиэннэрэ бары үчүгэй бэлэмнээхтэрин уонна сыалы ситиһэргэ тулуурдаахтарын көрдөрдүлэр. Түһүмэхтэр доҕордоһуу, бэйэ-бэйэҕэ көмөлөһүү эйгэтигэр аастылар.
