«Якутскэнерго» хампаанньа үлэһиттэрэ Таатта оройуонугар үрдүк вольталаах линиялары оҥороллор. Билигин Ытык Күөл уонна Уолба икки ардыгар былааннаммыт 22-тэн 20 баҕананы туруорбуттар. Чурапчы уонна Хаандыга икки ардыгар үрдүк вольталаах ситими өрөмүөннээн бүтэрбиттэр. «Ытык Күөл — Уолба, Уолба — Уус Таатта, Уолба – Мэҥэ-Алдан уонна Чурапчы — Ытык Күөл икки ардыгар уот ситимин кэмигэр саҥардан, бу нэһилиэктэргэ уонна Таатта сорох сайылыктарыгар уот күүһүрдэ», — диэн «Якутскэнерго» хампаанньа пресс-сулууспата иһитиннэрэр.
20 «А» быһыылаах уонна 75 «П» быһыылаах баҕаналары уларыппыттар. Уолба уонна Мэҥэ Алдан икки ардыгар 630 баҕанаҕа уот ситимин тымныыттан харыстыыр сүһүөхтэри туруорбуттар. Тааттатааҕы РЭС салайааччыта Ислам Сейдалов этэринэн, Ытык Күөл — Харбалаах уонна Ытык Күөл — Лыппыарыйа икки ардыгар баҕанаҕа изолятордары эмиэ уларыппыттар.
«Якутскэнерго» генеральнай дириэктэрэ Алексей Стручков 2020 сылга Саха сирин киин улуустарыгар уот эбийиэктэрин хапытаалынай өрөмүөнүгэр улахан үлэ барда диэтэ.
