Таатта улууһун Орто Амма нэһилиэгэр Н.Е. Мординов-Амма Аччыгыйа аатын сүгэр Харбалаахтааҕы үөрэхтээһин холбоһугун лиссиэйигэр 9 бөлөххө 124 устудьуон быйылгы үөрэх дьылын саҕалаата.
Маҥнайгы куурус устудьуоннара идэлэригэр сыһыаннаах Харбалаахха баар тэрилтэлэргэ экскурсияҕа сылдьан, үгүһү билэн-көрөн, астынан кэллилэр.
Хайаны байытар үлэ массыыналарыгар үөрэнэр устудьуоннар Харбалаахтааҕы «Төлөн» ААУо чоҕу хостуурга туттар тиэхиньикэлэрин көрдүлэр, үлэни-хамнаһы билистилэр.
Баһаарынай идэтигэр үөрэнээччилэр олохтоох МПЧ-га сылдьан баһаарынай массыына хайдах үлэлиирин көрөн, идэлэрин туһунан бастакы өйдөбүлү ыллылар.
Тыа хаһаайыстыбатын маастарын идэтигэр үөрэнэр устудьуоннар «Төҥүттэ» алааһыгар олохсуйан үлэлии турар Василий Константинович Татаринов салайааччылаах «Хочо» бааһынай хаһаайыстыбатыгар ыалдьыттаатылар.
