Таатта улууһугар «Мин уонна мин аҕа сүбэһитим» диэн күрэс ыытылынна

Таатта улууһун Орто Амма нэһилиэгин Харбалаах бөһүөлэгин  Н.Е. Мординов аатынан  үөрэхтээһин холбоһугар улууска бастакынан «Мин уонна мин аҕа сүбэһитим» диэн эдэр учуутал уонна кини настаабынньыга кыттыылаах күөн күрэс ыытылынна. Манна 14 хамаанда кыттан, 4 араас көрүҥҥэ интегрированнай уруок ыыттылар. Настаабынньык сүбэһит быһыытынан кистэлэҥнэрин билиһиннэрдэ, бэйэни билиһиннэриигэ, эдэр учууталлар  аныгы үөрэхтээһиҥҥэ көрүүлэригэр бырайыак оҥорон көмүскээтилэр. Түөрт көрүҥ түмүгүнэн  кыайыылаах аатын Тааттатааҕы лицей хамаандата (Апросимова Э.П. уонна Жиркова А.А.) ылла. Кыайыылаахтар  олунньу ортотугар Ньурбаҕа Таатта улууһун аатын көмүскүөхтэрэ. Онон быйыл 60 сааһын бэлиэтиир Харбалаах бөһүөлэгэр Россияҕа биллэриллибит сүбэһит сылынан үтүө тэрээһин сүрэхтэннэ.