Дьон олоҕун хаачыстыбатын үрдэтии уонна хаарбах, саахалланар туруктаах дьиэ ахсаанын аҕыйатыы – көһөрүү бырагырааматын сүрүн сыала буолар. Ааспыт ыйга Территориялары сайыннарыы пуондата (ФРТ) тустаах бырагыраама олоххо киирэригэр регионнарга 3,3 млрд солк ыытар туһунан быһаарыыны ылыммыт.
«Дьону хаарбах дьиэттэн көһөрүүгэ үбүлээһин регионнарга хас да түһүмэҕинэн ыытыллар. Бастаан биһиги сайаапкалартан ыйыллыбыт сууматтан 30%-нын ыытабыт, онтон хаалбыт сууманы дьиэ тутуутугар эбэтэр кыбартыыраны атыылаһыыга туһааннаах хантыраак баттаннаҕына биирдэ биэрэбит. Ол курдук, ыам ыйыгар пуонда сайаапканы тутан 469,5 мөл солк ыытарга быһаарынна, онтон хаалбыт 2,8 мрлд солк хантыраактар баттаммыттарын кэнниттэн биирдэ көрөбүт. Маннык түһүмэхтэринэн харчыны биэрии бырагыраама үбүлээһинин таһымын үрдэтэр», – диэн пуонда генеральный дириэктэрэ Ильшат Шагиахметов эттэ.
Ильшат Шагиахметов этэринэн, «Олорор дьиэ уонна куорат эйгэтэ» национальнай бырайыагынан 2019 сылтан ыла хаарбах, саахалланар туруктаах дьиэлэртэн элбэх киһи Ханты-Мансийскай АУо – 52,5 тыһ киһи, Пермь кыраайыгар – 47,3 тыһ., Ямало-Ненецкэй автономнай уокурукка – 45,2 тыһ. уонна Саха сиригэр – 40,5 тыс.
