Тохсунньу 23 күнүттэн саха литературатын классикага, Николай Неустроев пьесатынан уһуллубут «Тиэтэйбит» кэмиэдийэ өрөспүүбүлүкэ киинэ тыйаатырдарыгар көстүөҕэ.
Ааттыын да Омуннаах Уйбаан ойоҕо өлбүт диэн сураҕы истэн, кэргэн кэпсэтэ барар. Ол түмүгэр киһи күлүөх, сонньуйуох быһылааннара тахсаллар. Хартыынаны устааччылар айымньы ис хоһоонуттан тэйбэккэ, суруйааччы баай тылын-өһүн хаалларан туран, уус-уран киинэни таһаарарга кыһаннылар. Бэрт кыра, күҥҥэ-дьылга эрэ сыһыаннаах уларытыылары киллэрдилэр.
«Холобура айымньынан дьыл кэмэ саас эбит буоллаҕына, биһиэнэ сайын буолла. Дьоммут хонон ыллылар. Сүрүннээн артыыс оруолу толоруутугар болҕомтобутун уурдубут. Артыыс идэтигэр уонна тыйаатырга тапталбытын киинэ нөҥүө билиниэхпитин баҕарабыт. Тыйаатыр иһигэр буола турар киинэ курдук оҥордубут. Төһө табыллыбытын дуу, суоҕун дуу көрөөччү бэйэтэ сыаналыа», — диэн киинэ режиссера Роман Дророфеев кэпсээтэ.
Омуннаах Уйбааны саха тыйаатырын артыыһа Иннокентий Луковцев оонньуур. Уйбаан чахчы да көҥүл, омуннаах олохтоох. Сылдьар сырыылаах, киэн ыырдаах киһи. Арай кинини ыалга көмөлөһөөччүнэн үлэлиир тыла суох саастаах дьахтар кистии-саба сөбүлүүр, таптыы көрөр. Кинини саха тыйаатырын артыыската Нюргуяна Шадрина толордо.
Хартыынаны бу сайын Николай Неустроев төрөөбүт дойдутугар Тааттаҕа Ытык Күөлгэ, Чөркөөххө, ону тэнэ Нам улууһугар уһуллулар. Билигин киинэ тыаһа-ууһа чочуллан, 90 бырыһыан бэлэм.
«Бу бэйэбит сахалыы тылбыт-өспүт барыта ити киинэҕэ баар. Николай Денисович Неустроев саха литературатыгар бастакынан комедия жанрын киллэрбит киһи буолар. Онон уус-уран сахалыы тылы истэн көрөөччү дуоһуйуо дии саныыбын», — диэн киинэ продюсера Илья Портнягин санаатын үллэһиннэ.
Бу иннинэ «Тиэтэйбит» испэктээкил уонна музыкальнай опера буолан дьонно-сэргэҕэ биллибитэ. Аны билигин уус-уран киинэ уһуллан, саха классига Николай Неустроев биир бастьын айымньыта саҥалыы тыыннанан, көрөөччү дьүүлүгэр тахсыаҕа.
