Булуҥ улууһун Тиксии бөһүөлэгин киинэ тыйаатырыгар «Пушкинскай каарта» федеральнай бырагыраама үлэлиэҕэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрдэ.
«Билигин Хотугу Муустаах Муора кытылыгар баар Тиксии бөһүөлэгин үөрэнээччилэрэ уонна ыччата Россияҕа уһуллубут киинэ билиэттэрин «Пушкинскай каартанан» төлүөхтэрэ. Быйылгыттан бу каарта суумата биэс тыһыынча солкуобайга тэҥнэһэр», — диэтэ Ил Дархан Айсен Николаев.
Култуурнай-спортивнай комплекс киинэ саалатын дириэктэрэ Василий Бурцев этэринэн «Пушкинскай каартанан» «Мистер нокаут» киинэҕэ билиэт ылыахха сөп.
«Биллиилээх Сэбиэскэй боксер Валерий Попенченко туһунан киинэ олунньу 23 күнүгэр дойду бары киинэ тыйаатырдарыгар тахсыаҕа. Бу киинэҕэ билиэти «Пушкинскай каартанан» атыылаһыахха сөп», — диэтэ Василий Бурцев.
СӨ култуураҕа уонна духуобунай сайдыыга министиэристибэтэ «Пушкинскай каарта» бырайыагы олоххо киллэриигэ «PRO.Культура.РФ» порталыгар Саха сирин 42 киинэ тыйаатырыттан улахан аҥара бэлиэтэммитин иһитиннэрдэ.
