Бүгүн, тохсунньу 13 күнүгэр, дойду үрдүнэн бэчээт эйгэтин, сонуну киэҥник тарҕатар үлэһиттэр, суруналыыстар идэтийбит бырааһынньыктара — Россия бэчээтин күнэ бэлиэтэнэр.
Бу күн 1703 сыллаахха Петр I уурааҕынан «Ведомости» диэн Россияҕа бастакы хаһыат бэчээттэнэн тахсыбыта. 1991 сыллаахха, РСФСР Верховнай Сэбиэтин Президиумун уурааҕынан Россия бэчээтин күнүнэн биллэриллибитэ.
Ил Дархан Айсен Николаев өрөспүүбүлүкэ бэчээтин үлэһиттэрин уонна бэтэрээннэрин идэлээх бырааһынньыктарынан эҕэрдэлээтэ.
«Үүммут 2021 сылга биһиги Саха сиригэр бэчээт дьыалата олохтоноругар уонна литературнай тыл чөл хааларыгар бигэ тирэх буолбут сахалыы тылынан бастакы таһаарыы 100 сылын уонна өрөспүүбүлүкэ бастакы типографиятын 160 сылын бэлиэтиибит. Биһиги хотугу кыраайбытыгар суруналыыстыка уонна бэчээт дьыалатыгар үтүө үгэс утумун олохтообуттарга ытыктабылбытын биллэрэбит», — диэн Ил Дархан эттэ.
Бүгүҥҥү күҥҥэ Саха сиригэр 226 сонуну киэҥник тарҕатар сириэстибэ үлэлиирин, ол бэчээт көҥүлэ уонна аһаҕас сырдатар үлэ былаас, уопсастыба уонна бизнес бииргэ ыытар үлэлэрин тирэҕинэн буолалларын туоһулуурун бэлиэтээтэ.
«Хамсык уустук кэмигэр суруналыыс кырдьыктаах иһитиннэрии иһин нэһилиэнньэ иннигэр эппиэтинэһэ, иһитиннэриини суһаллык тиэрдиитэ дьон-сэргэ олоҕун тыын суолталаах боппуруостарын быһаарыыга төһүү буолара арылхайдык көһүннэ. Сонуну киэҥник тарҕатар сириэстибэлэргэ сырдатыллар билиҥҥи кэм дьоруойдарын хорсун быһыылара биһигини сомоҕолуур, бары ыарахаттары туоруурбутугар эрэли үөскэтэр. Бу үөрүүлээх күҥҥэ бэчээт эйгэтин үлэһиттэригэр барыгытыгар уопсастыбаҕа сырдатар үлэни тэрийиигэ дьоһун кылааккыт иһин махтанабын. Өрөспүүбүлүкэ социальнай-экэнэмиичэскэй сайдыытыгар көмөҕүт иһин бэчээт эйгэтин бэтэрээннэригэр дириҥ махталбын тиэрдэбин», — диэн өрөспүүбүлүкэ баһылыга эҕэрдэлээтэ.
