Бүгүн, тохсунньу 13 күнүгэр, дойду үрдүнэн бэчээт эйгэтин, сонуну киэҥник тарҕатар үлэһиттэр, суруналыыстар идэтийбит бырааһынньыктара — Россия бэчээтин күнэ бэлиэтэнэр.
Бу күн 1703 сыллаахха Петр I уурааҕынан «Ведомости» диэн Россияҕа бастакы хаһыат бэчээттэнэн тахсыбыта. 1991 сыллаахха, РСФСР Верховнай Сэбиэтин Президиумун уурааҕынан Россия бэчээтин күнүнэн биллэриллибитэ.
Ил Дархан Айсен Николаев өрөспүүбүлүкэ бэчээтин үлэһиттэрин идэлээх бырааһынньыктарынан эҕэрдэлээтэ.
«Саха Өрөспүүбүлүкэтин салалтатын уонна тус бэйэм ааппыттан тылы кытта үлэлиир дьону барыгытын – Россия бэчээтин күнүнэн эҕэрдэлиибин! Эһиги эрэ биһиги олохпут бары өрүтүн сырдатаҕыт. Эһиги былаас уонна уопсастыба икки ардыларыгар кэпсэтиини тэрийэҕит. Манна сүрүн ситим буолаҕыт. Сонуннары түргэнник уонна хаачыстыбалаахтык иһитиннэрэн, олох бары хайысхаларыгар ырытыы – эһиги соруккут. Бу соругу эһиги сөпкө толороҕут», – диэн Ил Дархан Айсен Николаев эттэ.
Ил Дархан этэринэн, билигин Саха сиригэр сонуннары киэҥник тарҕатар сүүһүнэн сириэстибэ бэлиэтэммит. Ону тэҥэ интернет-таһаарыылар ахсааннара элбээбит.
«Саха сиригэр аныгы пресса үчүгэй тэтимнээхтик сайдар. Эһиги саҥа былаһааккалары, сонуннары биэриини баһылаан, сайдыыны иннин диэки хамсатаҕыт. Бары уопсай күүспүтүнэн биһиги өрөспүүбүлүкэбит саҥа сүүс сыла саҕаламмыт сылыгар элбэҕи ситиһиэхпит диэн эрэнэбин. Сонуннары киэҥник тарҕатар ситимнэр бэтэрээннэригэр ураты махталбын тиэрдэбин! Күндү доҕоттор, бу үөрүүлээх бырааһынньык күн эһиги тылгыт-өскүт төрөөбүт өрөспүүбүлүкэбит уонна Саха сирин бары олохтоохторун тупсаҕай олохтоноругар көмөлөстүн! Эһиэхэ эйэни, бары үтүөнү, чэгиэн доруобуйаны баҕарабын!», – диэн Айсен Николаев түмүктээтэ.
