Томпо улууһун Дьабарыкы Хайа бөһүөлэгэр тутуллубут үрүҥ эһэни Россия салгын-космическай күүстэрин байыаннай-транспортнай авиациятын таарыйа көтөр сөмөлүөтүнэн Москваҕа ыыттылар. Бу туһунан нуучча географическэй уопсастыбатын пресс-сулууспата иһитиннэрэр.
Үрүҥ эһэни Москватааҕы зоопаркаҕа реабилитацияҕа ыытыга уустуктар үөскээбиттэрин кэннэ байыаннай борт тардыллыбыта — Дьокуускай аэропордун көтөр-түһэр балаһата өрөмүөҥҥэ сабыллыбытынан сибээстээн, улахан тырааныспар сөмөлүөттэрэ түһэр кыахтара суох. Оттон 1,35 миэтэрэ үрдүктээх клеткэ пассажирдары тиэйэр лайнердар таһаҕас тиэйэр люктарыгар баппат.
Онуоха нуучча географическэй уопсастыбата Россия оборонаҕа министиэристибэтигэр көрдөспүт.
Сөмөлүөт ыам ыйын 22 күнүгэр көппүт. Тохтобуллардаах көтөр, онон ыам ыйын 23 күнүгэр Москва бириэмэтинэн күн иккис аҥарыгар тиийиэхтээх.
Үрүҥ эһэни эвакуациялааһыҥҥа Саха сирин эколог учуонайдара, нуучча географическэй уопсастыбата, Россия оборонаҕа министиэристибэтэ уоннна Москваатааҕы зоопарка исписэлиистэрэ кыттыыны ылбыттара бэлиэтэнэр.
«Кыыл тиийээтин кытта Москваатааҕы зоопаркаҕа дириҥник чинчийиигэ уонна реабилитациялааһыҥҥа ыытыллыаҕа», – диэн этиллэр.
Дьиэ тиэргэнигэр киирбит үрүҥ эһэни Дьабарыкы Хайаттан ыам ыйын 11 күнүгэр «Орто Дойду» зоопаркатыгар аҕалбыттара. Аан бастаан кинини кулун тутар 30 күнүгэр Дьааҥы улууһун Столбы сэлиэнньэтиттэн 20 килэмиэтирдээх сиргэ көрбүттэрэ. Ол кэннэ муус устар 15 күнүгэр Томпоҕо суол устун сүүрэн иһэрин көрбүттэрэ. Муус устар 29 күнүгэр Томпо улууһугар, Хаандыга үрэххэ балыктыы сылдьыбыт эр киһи үрүҥ эһэҕэ түбэспит видеота интернет ситимигэр тарҕаммыта.
Бэтэринээдэр сабаҕалааһыннарынан икки саастаах тыһы үрүҥ эһэ буолар.
«Үрүҥ эһэ төрүүр-ууһуур сириттэн бастакытын маннык ыраах кэллэ. Магадаҥҥа тиийэр түбэлтэлэрэ бэлиэтэнээччилэр. Оттон билигин үрүҥ эһэ материк ортотугар тыһыынча кэриҥэ килэмиэтиргэ киирдэ. Эдэр кыыл ийэтиттэн тэйэн баран муммут буолуон сөп. Кини ууну уонна аһылыгы көрдөөн үрүйэлэри кыйа барбыт. Сатаан бултаабат. Балыксыттар уонна булчуттар хаалларбыт тохтобулларыгар аһы көрдүү сылдьыбыт быһылаах. Улаханнык аччыктаан ыйааһынын сүтэрбит», – диэн СО РАН биологическэй кыһалҕалары чинчийэр институтун үрдүкү научнай үлэһитэ Егор Кириллин кэпсээтэ.
Үрүҥ эһэ туруга кутталы үөскэтэр: ас буһарар уорганнара кыһалҕалаах, сааһыгар холоотоххо ыйааһынна тиийбэт, биир аһыыта суох. Эһэ инники дьылҕатын Москваатааҕы зоопаркаҕа реабилитацияламмытын кэннэ быһаарыахатара.
