«Триумф» спорт киинигэр амбулаторнай кииҥҥэ уопсайа 175 медицина үлэһитэ үлэлиир буолуоҕа.
Бу туһунан «Россия 24» ханаалга ГТРК «Саха» «Прямой разговор» биэриигэ Саха сирин Ил Дархана Айсен Николаев иһитиннэрдэ.
«Кииҥҥэ ОРВИ симптомнаах дьон кэлэн ИХА-тест туттарыахтарын сөп. Өскөтүн 15 мүнүүтэнэн анаалис «отрицательнай» буоллаҕына ОРВИ симптомнаах киһи хаҥас диэки олорор быраастарга тиийэн көрдөрөр. Оттон «положительнай» буолар түгэнигэр уҥа диэки коронавирус быраастарыгар барар. Кинилэр рецепт суруйуохтара уонна босхо эмп биэриэхтэрэ. Олохтоох бириэмэнэн 8 чаастан 20 чааска диэри 175 медицина үлэһитэ үлэлиэҕэ», — диэтэ кини.
Айсен Николаев этэринэн, «Триумф» амбулаторнай киинэ күҥҥэ 600-700 киһиэхэ үрдүк квалификациялаах консультацияны биэриэҕэ уонна көмөнү оҥоруоҕа. Киин тохсунньу 27 күнүгэр күнүс 14.00 чаастан үлэтин саҕалыаҕа.
«Холобур, сорох улахан поликлиникалар күҥҥэ элбээбитэ 350 киһини көрөр кыахтаахтар. Ол иһин «Триумфка» аһыллар амбулаторнай киин өрөспүүбүлүкэ олохтоохторугар көмө оҥоруоҕа», — диэн Ил Дархан эттэ.
