«Үлэ кыбаарталыгар» 14 стендэҕэ ИТ хайысхатыгар дойду бастыҥ бородуукталара киирдилэр. Экспозиция сэтинньи 12-13 күннэригэр үлэлиир. Экспердэр этэллэринэн, Россия оҥорон таһаарар бородуукталарын, федеральнай таһымнаах быһаарыылары киэҥ эйгэҕэ тарҕатарга «Цифровой Алмаз» форум быыстапката табыгастаах былаһаакка буолар.
Быйылгы быыстапкаҕа «Сбер» цифровой экосистематын, Россия улахан провайдера «Ростелеком» өҥөлөрүн, АЛРОСА өйөөбүт инновационнай бырайыактарын уо.д.а. сервистэри, бородуукталары көрдөрүүгэ туруордулар.
Өрөспүүбүлүкэ аҕыйах ахсааннаах нэһилиэнньэлээх пуунннарыгар 70 сааланы арыйбыт «Экстра Синема» «Цифровой Алмаз» быыстапкатыгар биир бастыҥ уопутунан буолар. Манна анаан хампаанньа киинэ көрдөрөр сервердээх проекторы Саха сирин улуустарыгар тарҕатар. Бу бырайыак көмөтүнэн 110 тыһ. тахса тыа сирин олохтооҕо бэйэлэрин сэлиэнньэлэриттэн ыраах барбакка эрэ саҥа киинэлэри үчүгэй хаачыстыбаҕа көрөр кыахтаннылар.
Медицинаҕа бырагыраамалары оҥорор «Сайберия» хампаанньа рентгенолог-быраастарга үнүстүрүмүөннэри уонна көмпүүтэр уонна машиннай обучение көмөлөрүнэн үлэлиир медицинскэй хаартыскалары быыстапкаҕа сүрэхтээтэ.
2022 сыллаах быыстапка кыттыылааҕа «Якутск» ИТ-паарка «МультиДиТек» резидент-хампаанньата «Ойуулук» диэн ойуулук лабораториятын арыйда. Бүгүҥҥү күҥҥэ кинилэр 30-тан тахса аныгы сайдыылаах анимационнай бырайыактары олоххо киллэрдилэр, ол иһигэр НВК «Саха» кытары төрөөбүт тыллары харыстыыр сыалтан «Ытык чороон», «Остуоруйа холбуйата», «Сэргэ Уөрэх», «Роботы — Көрдөөх ахсаан» ойуулуктары таһаарда.
