Саха сирин быраастара Донецкай уонна Луганскай норуодунай өрөспүүбүлүкэлэргэ медицина исписэлиистэрин үөрэтэн, ыарыһахтары көрөн-истэн, эпэрээссийэ оҥорон кэллилэр. Бу туһунан 3-с №-дээх өрөспүүбүлүкэтээҕи клиническэй балыыһа кардиолог-бырааһа Туйара Румянцева иһитиннэрдэ.
Кини Кировскай уобаласка сөргүтүү үлэтэ күүскэ ыытылла турарын бэлиэтээтэ. Ол курдук, Россия састаабыгар киириэхтэриттэн суоллары көннөрүү, өрөмүөннээһин ыытыллар, суол кытыытынааҕы уоттары оҥорбуттар, оскуоланы өрөмүөннээбиттэр, Таҥара дьиэтин сөргүппүттэр уо.д.а. Саха сириттэн быраастар кэлэллэрин истэн Шахтерскайтан, Енакиевоттан, Луганскайтан дьон-сэргэ көрдөрө кэлбит.
«Күн аайы тыас-уус ыраах этиҥ тыаһыныы ньиргийэр. Бу уобаласка 200-тэн тахса киһи кэлэн сүрэхтэрин көрдөрүнэн, сүбэ-ама ылан бардылар. 20-тэн тахса киһиэхэ сүрэх эпэрээссийэтин оҥордубут. Уонна сүрүн сыалбыт олохтоох быраастарга маастар-кылаас ыытан, медицина оборудованиетын туһанарга үөрэтэн кэллибит», — диэтэ кини.
Кардиолог-быраас этэринэн, дьон кэмигэр көрдөрбөккө ыарыылара дириҥээбит. Ол анаалыһы туттарыы сыанатыттан уонна билиҥҥи балаһыанньаттан тутулуктааҕын бэлиэтээтэ. Сүрэх — тымыр, харах ыарыыта бастакы турарын эттэ.
«Көрдөрбүт дьон 60%-на алта уоннарыттан үөһээ саастаахтар, 40%-на — эдэр дьон. Итиэннэ байыаннай дьайыыга бааһыран эргиллибиттэр анаалыс туттардылар, көрдөрдүлэр», — диэтэ Туйара Румянцева.
Донецкай норуодунай өрөспүүбүлүкэ доруобуйа харыстабылын миниистирэ Дмитрий Гарцев Саха сирин быраастарын биригээдэтигэр махтал суруктары туттарбыт. Олохтоох дьон-сэргэ үрдүк таһымнаах медицина өҥөтүнэн туһанан махтана хаалбыт.
