Кулун тутар сахаҕа дириҥ суолталаах ый. Аата да этэринэн, бу кэмҥэ Дьөһөгөй оҕото хонууга-сырыыга көҥүл төрүүр-ууһуур. Дьөһөгөй Айыы сылгы таҥарата. Кини киһиэхэ күүһү, үлэлиир дьоҕуру, хаһаайын буолууну биэрэр. Уонна бэйэ бас билэр күрүөлэниитэ, дьиэлэниитэ, уоттаныыта, үүнээйи үүннэринии, сүөһүлэнии, сылгыланыы буолар. Бу ый үксэ кыһыҥҥы кэмҥэ киирэр. Кулун тутар 22 күнүгэр сырдык уонна хараҥа тэҥнэһэллэр, онтон сырдык баһыйан барар. Онон бу кэм саас саҕаламмыт күнүнэн ааҕыллар. Бу кэмҥэ киһи харыстаныахтаах. Эргэ дьыл бүтэр, саҥа дьыл саҕаланар, тот салгын кэлэр.
Кулун тутарга бэлиэтээһин буолар. Бу бэлиэтээһин олунньутааҕы сылыйыы кэмин баттаһа буолар уонна муус устарга ириэрии буолан эргийэр.
Кулун тутар 1-6 күннэригэр күн-дьыл туруга
Илин эҥээр улуустарга субуота, өрөбүл түүн 25–32, күнүс 22–25 кыраадыс буолуо. Онтон сэрэдэҕэ, чэппиэргэ түүнүн 38–39, күнүһүн 23–21 кыраадыс тымныы туруо. Бэнидиэнньик күн хаардыаҕа.
Киин улуустарга субуота, өрөбүл түүн 26–30, күнүс 23–24 кыраадыс буолуо. Кэлэр сэрэдэҕэ, чэппиэргэ түүҥҥү өттүгэр 33–32, күнүһүн 23–22 кыраадыс.
Бүлүү эҥээр улуустарга субуота, өрөбүл түүн 34–32, күнүс 27–26 кыраадыс. Сэрэдэ, чэппиэр түүн 28–27, күнүс 24–22 кыраадыс тымныйыа.
Соҕуруулуу-арҕаа улуустарга субуота, өрөбүл түүҥҥү өттүгэр 27–32, күнүһүн 24–23 буолуо. Сэрэдэҕэ, чэппиэргэ түүн 24–25, күнүс 16–14 кыраадыс туруо.
Өймөкөөҥҥө субуотаҕа, өрөбүлгэ түүҥҥү өттүгэр 42–43 кыраадыс буолар, күнүс 28–29 тымныы туруо. Сэрэдэҕэ, чэппиэргэ түүҥҥү өттүгэр 42–41, күнүһүн 26–25 кыраадыс тымныйыа. Сэрэдэ күн хаардыаҕа.
Дьааҥы эҥээр улуустарга субуотаҕа, өрөбүлгэ 41–40, күнүһүн 31–32 кыраадыс. Сэрэдэҕэ, чэппиэргэ түүн 43–41, күнүс 31–28 кыраадыс буолар. Бэнидиэнньиккэ уонна оптуорунньукка хаардаах буолуоҕа.
Халыма–Индигиир улуустарыгар субуота, өрөбүл түүҥҥү өттүгэр 45–46, күнүһүн 30–31. Сэрэдэҕэ, чэппиэргэ түүн 42–32, күнүс 26–24 кыраадыс тымныы буолар. Бэнидиэнньиккэ эмиэ хаардыыр.
Арктика эҥээр улуустарга субуота, өрөбүл түүнүн 35–33, күнүһүн 31–30. Сэрэдэҕэ, чэппиэргэ түүн 28–29, күнүс 27–28 кыраадыс тымныы буолар. Оптуорунньукка хаардыыра күүтүллэр.
Күн эстиитэ
Күҥҥэ улахан эстиилэр суохтар. Субуотаҕа 5-тии бааллаах эстиилэр бааллар. Онтон атын күннэргэ барыта 2-лии, 1-ии бааллаах киһиэхэ улаханнык дьайбат көрдөрүүлэр буолуохтара. Онон кэлэргэ-барарга, бырааһынньыкка тэринэргэ саамай үчүгэй күннэр турбуттар. Ханна баҕар сылдьарга, массыынанан айанныырга олус үчүгэй бириэмэ.
Тарас Тарасов-Тускул
