Атырдьах ыйын 8 күнүгэр, Тверь уобалаһыгар Сэбиэскэй Союз геройа Федор Охлопков аатынан военно-патриотическай лааҕыр арыллыбытын туһунан ТАСС иһитиннэрэр.
«Лааҕыр тутуута — бу Саха сирэ уонна Тверь уобалаһын өр сыллаах бииргэ үлэлэрин өссө биир үктэллэрэ буолар. 1941-1943 сылларга Ржев сиригэр икки тыһыынча кэриҥэ саха саллаата кыргыспыта. Кинилэри кэриэстээн, өрөспүүбүлүкэ көҕүлээһининэн 1994 сыллаахха Ржев оройуонун Филькино дэриэбинэтигэр бүтүн арассыыйатааҕы суолталаах мемориал тутуллубута», — диэн иһитиннэриигэ этиллэр.
2005 сыллаахха мемориал аттыгар сибэтиэй Николай Чудотворец чосуобуньа-хараама туруоруллубута. 2019 сылга военно-патриотическай иитии уонна көрдөөһүн үлэтин киинэ буолар аналлаах военно-патриотическай лааҕыр тутуута саҕаламмыта.
Федор Охлопков аатынан лааҕыр 20 килэмиэтирдээх туристическай, военно-патриотическай суол «Дороги Победы. Путешествия для школьников» патриотическай бырагыраама сүрүн туочуката буолуоҕа.
