Балаҕан ыйыгар «Твой старт» ыччакка аналлаах өрөспүүбүлүкэҕэ бастакы бизнес-акселератор үлэтин саҕалыаҕа. Бу туһунан Үүнэр көлүөнэ пуондатын пресс-сулууспата иһитиннэрэр.
Иһитиннэриини СӨ Үүнэр көлүөнэ пуондатын генеральнай дириэктэрэ Владимир Егоров Саха сирин үөрэҕин үлэһиттэрин атырдьах ыйынааҕы сүбэ мунньаҕар тириэртэ.
Бырагыраама 2021 сыл балаҕан ыйын 16 күнүттэн ахсынньы 19 күнүгэр диэри Үүнэр көлүөнэ пааркатын чэрчитинэн ыытыллар.
«Паарка тутуута 2021 сылга саҕаланыаҕа уонна 2025 сылга диэри киэҥ хабааннаах эбийиэги үлэҕэ киллэрэр былааннаахпыт. Ол иннинэ ис хоһоонугар болҕомтобутун уурабыт, ол эбэтэр оҕолорго уонна ыччакка тэҥинэн үөрэх бырагыраамаларын олоххо киллэрэбит уонна кэлэр резиденнэри кытта үлэлэһэбит», — диэтэ кини.
Владимир Егоров 2021 сылга Саха сирин сайдыытын корпорациятын уонна федеральнай экспертэри кытта бииргэ аныгы креативнай экономика ирдиир «Skills Сamp» үөрэх бырагыраамата ыытыллыбытын бэлиэтээтэ. Салгыы киһиэхэ предпринимательскай үөрүйэхтэри сайыннарыы муодула былааннанар.
Акселератор detiMBA Глобальнай бизнес оскуола оҕолоругар аналлаах бизнес-оскуола экспертизатыгар олоҕуран оҥоһуллубута. Онон оҕолору кытта үлэлииргэ Россия бастыҥ экспертэрэ кыттыһыахтара.
Саха сирин 8-11 кылааһын үөрэнээчилэрэ ссылканан киирэн тестаах анкетаны толоруохтарын сөп, ол түмүгэр бастыҥ үөрэнээччилэри аксеераторга талыахтара. Сайаапкалары хомуйуу балаҕан ыйын 7 күнүгэр диэри буолуоҕа.
Балаҕан ыйын 8-14 күннэригэр үрдүк баллаах анкеталары талыахтара. Бастыҥнарга бырайыак менеджерэ бэйэтэ эрийэн тиийиэҕэ.
Балаҕан ыйын 15 күнүгэр бүтэһиктээх испииһэк бэлэм буолуоҕа, балаҕан ыйын 16 күнүгэр — бырайыак саҕаланыаҕа уонна очно Дьокуускайга аһыллыаҕа.
