Өрөспүүбүлүкэҕэ сүөһү аһылыгын бэлэмниир хампаанньа кэмигэр тыа хаһаайыстыбатын дизельнэй уматыгынан хааччыйыы үлэтэ бара турар. Бастакы түһүмэххэ 19 оройуон уонна Дьокуускай хаһаайыстыбаларыгар 844,5 туонна уматыгы үллэрдилэр. Бу от ыйын ирдэбилин 20%-на буолар. Аны өрөспүүбүлүкэҕэ ньиэп бородууктатын саҥа баартыйата кэллэҕинэ хаһаайыстыбаларга үллэрэн биэриэхтэрэ. Бу туһунан брифиҥҥэ СӨ тыа хаһаайыстыбатын миниистирэ Артем Александров иһитиннэрдэ.
Миниистир этэринэн, от ыйын 11 күнүттэн «Туймаада-Нефть», «Саханефтегазсбыт», «Сервис Ойл» уонна «Сибойл» хампаанньалар бастакы бигэргэтиллибит кээмэйинэн дизельнэй уматыгы кутан саҕалаабыттар.
«Сүөһү аһылыгын бэлэмниир хампаанньа былаан быһыытынан бара турар. Тыа хаһаайыстыбатыгар киирбит боппуруостары суһаллык быһаарарга координационнай штаб үлэлиир. Улуустар баһылыктара уонна тыа хаһаайыстабытын управлениетын салайааччылара күннэтэ үлэ хайдах баран иһэрин туһунан иһитиннэриини дакылааттыыллар», — диэн Артем Александров бэлиэтээтэ.
Күн бүгүн хаһаайыстыбалартан бигэргэтиллибит кээмэйинэн уматык биэриитэ түмүктэммэт. Саҥа баартыйа кэллэҕинэ улуустарга тарҕаныаҕа. Дизельнэй уматыкка ким эбии төһөнү ыларынан көрөн үллэриэхтэрэ.
Сайыҥҥы үлэ кэмигэр тыа хаһаайыстыбатын уматыгынан тохтоло суох хааччылларыгар анаан СӨ тыа хаһаайыстыбатын министиэристибэтин уонна СӨ гражданскай көмүскэлгэ министиэристибэтин бирикээстэринэн уматык анал иһиккэ эрэ кутуллар. Докумуон улуустарга барыларыгар тарҕаммыта бэлиэтэнэр.
