Хотугулуу Илиҥҥи федеральнай үнүбэрсиэт педагогическай институтун анал үөрэхтээһин кафедратын преподавателлэрэ икки тыллаах эйгэҕэ оҕо саҥатын сайыннарыы туһунан быһаардылар. Бу туһунан үрдүк үөрэх кыһатын пресс-сулууспата иһитиннэрэр.
Кыра саастан икки тылы кытта алтыһан улааппыт оҕо тэҥинэн тыл икки систиэмэтин баһылыыр — араас тыллар грамматикаларын уонна синтаксиһын. Кафедра үрдүкү преподавателэ Нарияна Степанова быһаарбытынан, булкуйан саҥарыы тыл сайдыытыгар мэһэйдэри үөскэтиэн сөп.
«Оҕону кытта тылы булкуйан кэпсэтии соччото суох — нуучча тылыттан сахалыыга көһүү. Оттон төрөппүттэн биирэ нууччалыы, биирэ сахалыы эрэ саҥарар буоллаҕына — бу булкуйан саҥарыы дэммэт. Тыла бытааннык сайдар оҕоҕо иккис тыл уустук. Маннык түбэлтэҕэ биир тылы талан, оҕо ыраастык саҥарарын кэтиир ордук», — диэтэ кини.
Билингвизм усулуобуйатыгар тыла бытаан сайдыылаах оҕо биир сүрүн тылы баһылыыра ордугун кафедра үрдүкү преподавателэ Аграфена Иванова бэлиэтээтэ.
