Арктика салгына киириэҕиттэн Саха сирин кэккэ оройуоннарыгар -2 кыраадыска диэри тоҥоруу күүтүллэр. Онтон тымныы күн-дьыл өрөбүллэргэ 30 кыраадыс итиитинэн солбуллуоҕа.
«Бэҕэһээ Красноярскай кыраайтан циклон ааһыытынан арҕаа, киин, илин оройуоннарга тэтимнээх тыаллаах этиҥнээх ардах, сорох сирдэринэн самыыр ааста, бүгүн соҕуруулуу-илин уонна соҕуруу оройуоннарга көспүтэ бэлиэтэнэр. Бүлүү бөлөх улуустарга арктическай салгын киириитинэн бу түүн сорох сирдэринэн -2 кыраадыска диэри тымныйыан сөп, оттон бэс ыйын 12 күнүгэр түүн илин эҥэр, киин уонна арҕаа оройуоннарга салгын температурата намтыыра сабаҕаланар»,- диэн Саха сирин метеорологическай уонна агрометеорологическай билгэлээһиннэргэ отделын начальнига Саргылана Никитина үллэһиннэ.
Өрөспүүбүлүкэҕэ сөрүүн күн-дьыл бээтинсэҕэ диэри турара күүтүллэр. Субуотаҕа уонна өрөбүлгэ арҕаа Сибииртэн Мииринэй, Лиэнскэй оройуоннарга сылаас салгын маассата киирдэҕинэ 30 кыраадыс итиини билгэлииллэр.
«Субуотаҕа уонна өрөбүлгэ салгын температурата сыыйа үрдүөҕэ. Дьокуускайга уонна киин улуустарга +23-кэ диэри сылыйыаҕа, үксүн сөҥүү суох буолуоҕа. Оттон өрөспүүбүлүкэ арҕаа өттүгэр +30 кыраадыска диэри итии туруоҕа», — диэн Саргылаана Никитина эбэн эттэ.
