Саха сиригэр 2517 дьиэ кэргэн уһуйаан төлөбүрүттэн босхолонно. Бу туһунан брифиҥҥэ СӨ үөрэх уонна билим миниистирин бастакы солбуйааччыта Ньургун Павлов иһитиннэрдэ.
Ону кытта кини бэлиэтииринэн, аҕыс дьиэ кэргэн суукканы эргиччи үлэлиир бөлөхтөргө оҕолорун бастакы уочаратынан киллэрэргэ быраап ылла.
«62 дьиэ кэргэн оҕолорун дьиэлэриттэн чугас турар уһуйааҥҥа көһөрөр кыаҕы тутунна», — диэн Ньургун Павлов эттэ.
Өйөбүл миэрэлэрэ оскуола оҕолоругар эмиэ көрүллэллэр. СӨ үөрэҕин уонна билимин министиэристибэтин дааннайынан, итии аһылыгынан 5-11 кылаас 3964 оҕото хааччыллыбыт.
«Оҕо сынньалаҥын, чэбдигирэр уонна санаторнай-курортнай эмтэнии тэрилтэлэригэр 2123 путевка көрүлүннэ. 72 дьиэ кэргэн оҕолорун дьиэлэриттэн чугас турар оскуолаларга көһөрдө», — диэн миниистир бастакы солбуйааччыта эттэ.
Ньургун Павлов бэлиэтииринэн, 486 оҕо уһатыллыбыт күннээх бөлөхтөргө киирдэ уонна төлөбүртэн босхолонно.
«2964 оҕо эбии үөрэх бырагыраамаларынан дьарыктарга сылдьар — кружоктарга, сиэксийэлэргэ уонна да атын хайысхаларга», — диэн спикер иһитиннэрдэ.
Хаартыска: sakha.gov.ru
