Уһук Илиҥҥи уокурук олохтоохторо саҥа биир кэлим авиахампаанньа аатын талыахтара. Бу туһунан Россия Уһук Илини уонна Арктиканы сайыннарыыга министиэристибэтин пресс-сулууспата иһитиннэрэр.
Саҥа авиахампаанньа Россия бэрэсидьиэнэ Владимир Путин соругунан Уһук Илиҥҥи регионнар тырааныспартынай тоҕоосторун үрдэтэр, олохтоох уонна регионнар икки ардыларынааҕы салгынынан сырыыны сайыннарар сыалаах тэриллэр.
«Авиахампаанньа Уһук Илин бары интэриэһин учуоттуоҕа. Хампаанньаны тэриийигэ олохтоохтор кыттыыны ылалларын баҕарабыт. Онон аатын аһаҕас куоластааһын көмөтүнэн таларга быһаарынныбыт», — диэн дойду бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев эттэ.
Aviadv.ru сайт нөҥүө куоластааһыҥҥа кыттыахха эбэтэр бэйэҥ холобургун киллэриэххин сөп. Куоластааһын түмүгэ ахсынньы 31 күнүгэр биллэриллиэ. Ону тэҥэ, субу бу күн куонкурус кыттыылаахтарын икки ардыгар Уһук Илин регионнарын икки ардыларыгар босхо көтүүгэ бочуоттаах пассажир сертификаттары оонньотуохтара.
Уһук Илин хампаанньаларын түмүү сүүһүнэн ыраах сытар уонна тиийэргэ уустук нэһилиэнньэлээх пууннары биир кэлим ситиминэн хабар уонна пассажирдары хааччыйыы хаачыстыбатын үрдэтэр кыах биэрэрэ бэлиэтэнэр.
Авиахампаанньаны тэрийии көмөтүнэн биир кэлим өрөмүөннүүр, хааччыйар уонна үлэлэтэр инфраструктура, ону тэҥэ көтөр састаабы бэлэмниир кииннэр тэриллиэхтэрэ, авиапааркалар саҥардыллыахтара.
Саҥа хампаанньа өҥөтүнэн сыллата икки мөлүйүөн кэриҥэ олохтоох нэһилиэнньэ туһанара былааннанар. Олохтоох маршруттарынан 186 салгын суудуната көтүөҕэ, олор истэригэр Россияҕа оҥоһуллубут сөмөлүөттэр.
