Арктика уонна Уһук Илин сайдыытын министиэристибэтэ «Уһук Илиҥҥи гектар» бырагырааманы Арктикаҕа тэнитэргэ былаанныырын туһунан министиэристибэ иһитиннэрэр.
«Россия олохтооҕо Арктикаҕа дьиэ туттарга, эбэтэр үлэ тэринэргэ сир учаастагын босхо ылар кыахтанарыгар РФ вице-премьерэ Юрий Трутнев сорудаҕынан сокуон бырайыага бэлэмнэннэ. Эрдэ бу боппуруоһу хас да Арктика өрөгөйүөнүн дьаһалтата көҕүлээбитэ», — диэн иһитиннэриигэ этиллэр.
Саҥа сокуону таһаарбат туһугар «Уһук Илиҥҥи гектар» федеральнай сокуонугар уларытыы киллэрэргэ быһаарыы ылыныллыбытын туһунан министиэристибэ пресс-сулууспатыгар чуолкайдаан эттилэр. Бастакы алта ый устата учаастагы Арктика олохтоохторо эрэ ылар бырааптаныахтара, салгыы Россия бары олохтоохторо уонна кыраныысса таһыгар олорор биир дойдулаахтарбыт көһөн кэлэр түгэннэригэр ылалларын туһунан Арктика уонна Илиҥҥи сайдыы министиэристибэтэ иһитиннэрэр.
«Учаастак Арктика хонуу сиригэр эрэ бэриллиэҕэ: Мурманскай уобаласка, Ненецкэй уонна Ямало — Ненецкэй автономнай уокурукка, Красноярскай кыраай, Архангельскай уобалас, Коми, Карелия өрөспүүбүлүкэтин 23 оройуонугар. Чукотка автономнай уокуруга уонна Саха сирин арктика эҥэрдээҕи оройуоннара бу испииһэккэ киирбэттэр», — диэн пресс — сулууспа бэлиэтээтэ.
«Уһук Илиҥҥи гектар» докумуона интернетинэн надальнийвосток.рф сайт нөҥүө ыытыллар. Бастакы сылга учаастагы туттуу көрүҥүн чопчуланар, онтон үс сылынан декларация оҥоһуллар.
Биэс сылынан РФ олохтооҕо сири уһун кэмҥэ арендаҕа, эбэтэр босхо туһаныыга ылыан сөп. «Уһук Илиҥҥи гектар» олоххо киириэҕиттэн бырагырааманан уопсайа 82 тыһ. киһи туһанна.
