«Уһук Илиҥҥи гектар» бырагыраамманан сир учаастагын ылыы хааччахтааһын миэрэлэрэ сымнаатын кытта элбээтэ диэн ТАСС пресс-сулууспата иһитиннэрэр.
Самоизоляция эрэһиимэ биллэриллээтин кытта, дьон учаастак көрөр кыаҕа суох буолан, элбэх функциялаах кииннэр сабылланнар, Росреестр барыллаан суруттарыынан үлэлээбит буолан, динамика көрдөрүүтэ кыратык түһэ сылдьыбытын туһунан Уһук Илиҥҥэ киһи хапытаалын сайыннарыы агенствота иһитиннэрэр.
«Хааччахтааһын миэрэлэрин сымнатыы кэннэ сир учаастагар наадыйыы элбээтэ: ый аайы бырагыраамманан ортотунан биир тыһыынча кэриҥэ сайабылыанньа киирэр уонна оччо сир туһаҕа тахсар. Дьон үгүс өттө дьиэ туттаары, тыа хаһаайыстыбатынан уонна урбаанынан дьарыктанаары, ону тэҥэ туристическэй уонна сынньалаҥ бырайыактарын олоххо киллэрээри учаастак ылар» — диэн киһи хапытаалын сайыннарыы агенствотын генеральнай дириэктэрэ Сергей Ховрат биллэрдэ.
«Уһук Илиҥҥи гектар» бырагыраамманан 82 тыһыынча кэриҥэ киһи учаастак ылбыт. Ордук элбэх сайабылыанньа Приморскай, Хабаровскай уонна Забайкальскай кыраайдартан, Бурятияттан, Сахалин уобалаһыттан уонна Саха сириттэн кэлбит.
