Россия бырабыыталыстыбатыгар нэһилиэнньэтин ахсаана үрдүк көрдөрүүлээх Уһук Илиҥҥи федеральнай уокурук регионнарыгар матырыйаалынай көмөнү тыырыахтара. Бу туһунан РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев Уһук Илин уонна Арктика сайдыытын боппуруоһунан Россия министиэристибэтин мунньаҕар иитиннэрбит.
Россия бэрэсидьиэнэ Владимир Путин Саха сиригэр айанын иитинэн нэһилиэнньэтин ахсаана үрдээбит көрдөрүүлээх куораттарга матыыйаалынай көмөнү көрөр туһунан этиитин Юрий Трутнев санатта.
«Нэһилиэнньэ ахсаанын эбиллиитэ — сүрүн сыалбыт-сорукпут буолар. Сорох куораттар үтүө көрдөрүүлээхтэр. Нэһилиэнньэ ахсаанын үрдээһинин көрдөрүүтэ эбии үбү эрэйэр. Тоҕо диэтэххэ, эбии олорор дьиэ-уот, социальнай эбийиэк тутуллара, бүддьүөттэн харчы көрүллэрэ наада. Онон Бырабыыталыстыба иһинэн бу боппуруоһу көрүөхпүт. Итиэннэ быйыл бастыҥ көрдөрүүлээх Саха сиригэр, Камчаткаҕа, Чукоткаҕа матырыйаалынай көмөнөн өйөбүл оҥоруохпут. Холобур, былырыын Сахалин уобалаһа маннык көмөнү туһаммыта», – диэтэ Юрий Трутнев.
