Бэрэсидьиэн Владимир Путин Илиҥҥи экэнэмиичэскэй форумҥа икки сыл устата Уһук Илин регионнарын куораттарын көстүүтүн саҥардыы бырагырааматын оҥорорго сорудахтаабыта.
Дьокуускайга табыгастаах эйгэни оҥорууга маастар-былааҥҥа Бүтүн Россиятааҕы аһаҕас куонкурус ыытыллыаҕа. «Маастар-былаан соруга диэн, куорат ханнык хайысхаҕа сайдарын торумнуохтаах, ону таһынан ханнык бырагырааманан, хантан үп көрүллэрэ эмиэ манна киирэр. 2020 сылга территория комплекснай сайдыытын туһунан сокуон ылыллыбыта. Саха сиригэр комплекснай сайдыы операторынан РИК буолбута. Оттон маастар-былааны оҥорууга куонкурус сыл бүтүөр диэри саҕаланыа. Былааҥҥа дьоҥҥо табыгастаах буолууну, бастатан туран, учуоттуохтара. Холобур, элбэх этээстээх дьиэни тутарга аттыгар сөптөөх инфраструктура баарын-суоҕун маастар-былаантан көрүөхтэрэ. », – диэбит Саха сирин сүрүн архитектора Ирина Алексеева.
Куонкуруһу Үүнэр көлүөнэ пуондата уонна «ДОМ.РФ» сайдыы института үбүлүөҕэ.
«Сэтинньи 18 күнүгэр Ил Дархан уонна куорат баһылыга кыттыылаах пресс-конференция буолуоҕа, онно куонкурус саҕаланыаҕа. Салгыы масстар-былааны оҥорор үс бастыҥ хамаанданы талыахтара. Үлэ ыам ыйыгар түмүктэниэҕэ», – диэбит архитектор.
Саха сирэ территория сайдыытын кэнсиэйпсийэтигэр уопуттаах. Ону вице-премьер Юрий Трутнев судаарыстыбаннай сэбиэт мунньаҕар эмиэ бэлиэтээбитэ.
