«Дьиэ кэргэн» бэрэсидьиэн национальнай бырайыагын чэрчитинэн Мииринэй оройуонун Удачнай куоратын оҕо ускуустубатын оскуолатыгар саҥа муусука үнүстүрүмүөннэрэ уонна оборудование баар буолла. Оскуоланы бу маннык хааччыйарга федеральнай, өрөспүүбүлүкэтээҕи уонна олохтоох бүддьүөттэн биэс мөлүйүөнтэн тахса солкуобай суумалаах үбүлээһин көрүллүбүт.
Бу үбүнэн-харчынан графическай дизайн уруоктарыгар анаан акустическай роялы, графическай планшеттары уонна көмпүүтэр остуолларын, уруһуйдуур салаа кылаастарыгар пленэрдарга илдьэ сылдьар олоппостору уонна паарталары атыыластылар.
Ону тэҥэ алын кылаастарга үөрэнээччилэр паарталара, уруһуйдуур хосторго быыстапкаларга уонна биллэриилэргэ аналлаах улахан көһөрүллэр истиэндэлэр, гиипсэттэн фигуралар, сымыйа фрукталар уонна оҕуруот аһа, сырдатыы (софиты) баар буолбуттар.
Оҕо оскуолатын кэлэктиибэ дойду бэрэсидьиэнэ Владимир Путиҥҥа, Ил Дархан Айсен Николаевка уонна Мииринэй оройуонун баһылыга Александр Басыровка махтанар.
Россия бэрэсидьиэнэ Владимир Путин көҕүлээбит «Дьиэ кэргэн» национальнай бырайыак иитинэн быйыл өрөспүүбүлүкэҕэ сэттэ оҕо ускуустубатын оскуолата саҥа муусука үнүстүрүмүөннэринэн, оборудованиенан, үөрэнэр литэрэтиирэнэн хааччылынна.
Хаартыска: sakha.gov.ru
