Өрөспүүбүлүкэҕэ уопсайа 1244 судаарыстыбаннай уонна муниципальнай култуура тэрилтэлэригэр 10 тыһыынчаттан тахса киһи үлэлиир, үгүстэрэ тыа сиригэр олорор. Сэлиэнньэлэргэ 502 бибилэтиэкэ, 489 кулууп, 98 түмэл үлэлиир. Саха сирин култууратын тэрилтэлэригэр ханнык үлэһиттэргэ наадыйалларын СӨ Култуура уонна духуобунай сайдыыга миниистир бастакы солбуйааччыта Мария Турантаева «Актуальное интервью» биэриигэ иһитиннэрдэ.
«Култуура тэрилтэлэригэр каадырдар тиийбэттэр. Дойду бэрэсидьиэнэ Владимир Путин көҕүлээһининэн ааспыт сылтан «Земскэй култуура үлэһитэ» бырагыраама үлэлиир. Биһиэхэ 11 исписэлиис үлэҕэ киирдэ. Быйыл 27 миэстэҕэ дьону ылары былаанныыбыт. Өрөспүүбүлүкэбит көҕүлээһининэн биһиги РФ Сыыппара министиэристибэтин, РФ Култуура министиэристибэтин, СӨ Инновация министиэристибэтин кытта Госуслуга биир кэлим порталын нөҥүө сайабылыанньалары тутар форматы бэлэмнээтибит», — диэн Мария Турантаева эттэ.
Бүгүҥҥү күҥҥэ 100 тахса сайабылыанньа киирбит. Сайаапкалары муус устар 15 күнүгэр диэри туталлар.
«Сайаапкалары тутар икки бүтэһик нэдиэлэ иһигэр улуустарга үлэлии барыан баҕалаахтар ахсааннара элбиэҕэ диэн эрэллээхпин», — диэн миниистир бастакы солбуйааччыта бэлиэтээтэ.
Ол курдук, бастакы уочаратынан Арктика оройуоннарыгар Оҕо ускуустубатын оскуолаларыгар преподавателлэри ылыахтара. Ону тэҥэ тыа сиригэр түмэл үлэһиттэригэр, бибилэтиэкэрдэргэ наадыйаллар.
Хаартыска: Мария Архипова/ Якутия 24
