Саха сирин оһуохайдьыт оҕолоро ахсынньы 10 күнүгэр Дьокуускай куорат Аксения уонна Наталья Посельскаялар ааттарынан Үрдүкү балет оскуолатыгар өрөспүүбүлүкэтээҕи «Оһуокайдаан ойуохха, эһиэкэйдээн тэйиэххэ» оһуохай күрэҕэр муһуннулар.
Манна Саха сирин 16 улууһуттан 60-тан тахса оҕо кыттыыны ыллылар.
Уус Алдан улууһуттан оһуохай күрэҕэр 7-12 саастаахтарга Уһун Күөл орто оскуолатыттан Эрчим Афанасьев (салайааччы Лена Жиркова), Дүпсүн орто оскуолатыттан
Домира Дорофеева (с. Раиса Протопопова), 13-17 саастаахтарга Суотту орто оскуолата Инна Алексеева (с. Матрена Яковлева, Валентина Бубякина), Лөгөй лиссиэйиттэн Янис Сысолятин (с. Зинаида Лугинова) кыттыыны ыллылар.
Дьүүллүүр сүбэ сүрүн болҕомтотун этээччи тылыгар-өһүгэр, туттарыгар-хаптарыгар, сөпкө хамсаныытыгар, дьону түмэригэр уурдулар.
Күрэх түмүгүнэн оҕолорбут бары ситиһиилээхтик кытыннылар. Ол курдук, Домира Дорофеева 1 үрдэли ылан 35 тыһ. солк наҕараадаланна, Эрчим Афанасьев — 3 үрдэл, 15 тыһ. солк, Янис Сысолятин — 2 үктэл, «Дьулуруйар Ньургун Боотур» кинигэ уонна Инна Алексеева Саха сирин оһуохай түмсүүтүн Махтал суругунан бэлиэтэннэ.
«Оһуохайдьыт оҕолорбут, салайааччыларбыт улуустарын аатын дорҕоонноохтук ааттаттылар, ситиһиилээхтик кыттан сүргэбитин көтөхтүлэр», — диэн иһитиннэриигэ этиллэр.
