Уус Маайаҕа ойуур баһаардарын утары охсуһууга тиэхиньикэни ыытыахтара. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Улууска 13 ойуур баһаара баар, онтон аҕыһыгар салгыы үлэ ыытыллар.
Суукка иһигэр үс ойуур баһаарын умуруордулар, биири тохтоттулар. Ону тэҥэ, 0,5 га иэннээх сиргэ биир ойуур баһаара күөдьүйдэ.
«Авиация үлэтин сарсыарда 09:00 чаастан саҕалаабыта, баһаарга тоҕус киһини тиэртилэр. Улууска күн-дьыл туруга мөлтөөн, умуруоруу үлэтин ыаратта», — диэн иһитиннэриигэ этиллэр.
Россия ыксаллаах быһыыга-майгыга миниистирин бастакы солбуйааччыта Александр Чуприян уонна СӨ вице-премьерэ Дмитрий Садовников Уус Маайа улууһугар уоту утары охсуһар күүһү улаатыннарарга соруйдулар.
