Саха артыыһа Валентина Романова-Чыскыырай «Пугало» киинэҕэ оруолун иһин Asia Pacific Screen Awards бириэмийэҕэ «Бастыҥ дьахтар оруола» хайысхатыгар номинацияланна.
Режиссер Дмитрий Давыдов режиссердаах «Пугало» киинэтигэр сүрүн оруолу Саха сирин үтүөлээх артыыһа Валентина Романова-Чыскыырай толорбута. Киинэ сүрүн дьоруойа — түөрт уончалаах, дьонтон-сэргэттэн тэйиччи олорор, эмчит дьахтар. Дьон чугаһыы сатаабат эрээри, ураты күүһүгэр эрэнэн эмтэнэ кэлэр.
Азия-Тиихэй акыйаан регионун 25 дойдуттан уонна уобаластарыттан номинаннар бүгүн, алтынньы 13 күнүгэр быһаарылыннылар. Кыайыылаахтар ааттара сэтинньи 11 күнүгэр аан дойду үрдүнэн Asia Pacific Screen Awards 14-с бириэмийэҕэ биллэриэхтэрэ.
