«Азия оҕолоро» Норуоттар икки ардыларынааҕы спортивнай оонньуу кэмитиэтин бэрэсэдьиэнинэн Владимир Максимов ананна. Бу туһунан «Якутия 24» ханаал иһитиннэрэр.
«Владимир Максимов кандидатуратын өрөспүүбүлүкэ баһылыга Айсен Николаев туруорда. Владимир успуорт менеджменигэр улахан уопуттаах — 2008 сылтан «Азия оҕолоро» бырайыакка үлэлиир. 2012 уонна 2016 сылларга Оонньуулары ыытыы тэрээһинигэр, ону тэҥэ Сахалиҥҥа ыытыллыбыт бастакы кыһыҥҥы норуоттар икки ардыларынааҕы оонньууга эппиэттээҕинэн анаммыта. Бэрэсэдьиэҥҥэ кандидатураны тэрийээччилэр бары өйөөтүлэр», — диэтэ «Азия оҕолоро» Норуоттар икки ардыларынааҕы спортивнай оонньуу кэмитиэтин генеральнай дириэктэрэ Гаврил Цыпандин.
Кэтэхтэн куоластааһыҥҥа «Азия оҕолоро» Норуоттар икки ардыларынааҕы спортивнай оонньуу кэмитиэтин тэрийээччилэрэ кытыннылар — Саха сирин баһылыга, Россия Олимпийскай кэмитиэтин бэрэсэдьиэнэ Станислав Поздняков уонна Азия оонньууларын Азия Олимпийскай сэбиэтин дириэктэрэ Хайдер Фарман.
«Азия оҕолоро» Норуоттар икки ардыларынааҕы оонньуу Макао куоракка, 2012 сыл сэтинньи 8 күнүгэр, Азия Олимпийскай сэбиэт 31-с Генеральнай ассамблеятын чэрчитинэн, шейх Ахмад Аль-Фахад Аль-Сабах көҕүлээһининэн тэриллибитэ бэлиэтэнэр.
Тэрийээччилэринэн Саха сирэ, Россия Олимпийскай кэмитиэтэ уонна Азия Олимпийскай сэбиэтэ буолаллар.
