Балаҕан ыйын 16 күнүгэр Россия бэрэсидьиэнэ Владимир Путин Госдума быыбарын иннинэ дойду олохтоохторугар анал этиилээх таҕыста. Бу туһунан Кремль прес-сулууспата иһитиннэрэр.
«Биһиги бары парламеҥҥа эппиэттээх, көхтөөх, аптарытыаттаах, итэҕэллээх, дойду дьонун эрэлин уонна итэҕэлин толорор дьон кэлэллэрин баҕарабыт», — диэтэ кини.
Госдума — Россия судаарыстыбаннай былааһын систиэмэтигэр биир сүрүн уорган диэн бэрэсидьиэн бэлиэтээтэ.
«Бу уустук, сыралаах үлэ. Хас биирдии быһаарыы, хас биирдии сокуоҥҥа көннөрүү — мөлүйүөнүнэн киһи дьылҕатын быһаарар, уларытар үлэ идэни толору баһылааһыны уонна чуолкай өйдөбүлү ирдиир», — диэтэ Владимир Путин.
Дойду бэрэсидьиэнэ дойдуга күүстээх уонна аптарытыаттаах парламент наада диэн эбэн эттэ. Россия дьонун кэлэр куоластааһыҥҥа көхтөөхтүк кыттарга ыҥырда.
Санатар буоллахха, VIII ыҥырыылаах Госдума быыбара балаҕан ыйын 17, 18, 19 күннэригэр ыытыллар. Балаҕан ыйын 19 күнэ — дойду үрдүнэн биир кэлим куоластааһын күнэ.
