«Якутдорстрой» кэллэктиибин кытта көрсүһүүгэ Саха сиригэр Владимир Путин итэҕэллээҕэ Марина Бахилина кыттыыны ылла. Кини бэлиэтииринэн, муоста уонна суол тутуута өрөспүүбүлүкэ уонна дойду инфраструктуратын тупсарар оруоллаах.
«Суол-иис оҥоруута, тутуута элбэх киһи үлэтин сыратыттан тахсар. Үлэһиттэр таһырдьа халлаан туругуттан иҥнибэккэ, күнүстэри-түүннэри сыалларын-соруктарын толороллор. Суол тутуута, уулуссалары тупсарыы, өрөмүөн үлэтэ кэмигэр оҥоһуллара — бу барыта эһиги үлэҕит түмүгэ буолар» , — диэн Марина Бахилина эттэ.
Көрсүһүү кыттыылаахтара бэлиэтииллэринэн, билиҥҥи кэмҥэ суол-иис хайысхата куорат экономикатын сайыннарар. Бүтэһик сылларга Дьокуускай куорат суолун-ииһин хайысхата үрдүк көрдөрүүлээх. Ол курдук, өрөмүөннүүр хампаанньа үлэлиир тэтимэ үрдээтэ, автомагистраль тутуллар, суол-иис сайдар, дойду бэрэсидьиэнэ Владимир Путин көҕүлээбит «Куттала суох үчүгэй суол» национальнай бырайыак уонна да атын бырайыактар олоххо киирэллэр.
РФ бэрэсидьиэнэ Владимир Путин итэҕэллээх дьонун ортолоругар култуура уонна искуустуба, спорт, бизнес, медицинэ эйгэлэрин бэрэстэбииттэллэрэ киирсибиттэрэ. Уопсайа бу испииһэккэ 544 киһи киирдэ. Ол курдук, актердар Сергей Безруков уонна Владимир Машков, режиссер Никита Михалков, дирижер Юрий Башмет, тренер Ирина Винер уонна Россия бары регионнарын убаастабыллаах бэрэстэбиитэллэрэ.
Санатарбыт курдук, Россия бэрэсидьиэнин быыбара кулун тутар 15 күнүттэн 17 күнүгэр диэри буолуоҕа. Владимир Путины нэһилиэнньэ өйөөн, мөлүйүөнтэн тахса илии баттааһынын хомуйан, кини быыбарга бэйэтин туруорунна.
